حوار الأعضاء حول البرامج المدرسية

من طرف **naderwatfa** الجمعة 29 أغسطس 2014, 10:53 am

تذكير بمساهمة فاتح الموضوع :

بسم الله الرحمن الرحيم
*************
هذا الموضوع مخصص لحوار الأعضاء حول البرامج المدرسية

فأستقبل هنا آراءكم و مقترحاتكم بخصوص البرامج المدرسية
حيث يمكنني الرد عليكم و التحاور معكم فيما يخص هذه البرامج بشكل عام

نادر عبد الرحمن

من طرف **naderwatfa** الأحد 30 نوفمبر 2014, 6:24 am

يا راجل ما قلتش كده ليه من الأول
أنا عامل القيد في الصف الأول مستجد و في الثاني منقول لأن عندنا كده
أول مرة أعرف إن عندكم مستجد للكل
على كل حال خلال الأسبوع ده ها اغير القيد و أخلليه مستجد و منقول لكل الصفوف و اللي يعجبك اختاره

من طرف abdelnaserelsaid الأحد 30 نوفمبر 2014, 6:25 am

السلام عليكم ورحمة اللله
اخوانى الاعزاء طالب الصف الاول الاعدادى يعتبر مستجد والطالب ال بيعيد السنة يعتبر باق او باقى وطالب الصف الثانى يعتبر منقول او باقى وليس مستجد وهذا على حسب فهمى من الردود

من طرف **naderwatfa** الأحد 30 نوفمبر 2014, 6:27 am

abdelnaserelsaid كتب:السلام عليكم ورحمة اللله
اخوانى الاعزاء طالب الصف الاول الاعدادى يعتبر مستجد والطالب ال بيعيد السنة يعتبر باق او باقى وطالب الصف الثانى يعتبر منقول او باقى وليس مستجد وهذا على حسب فهمى من الردود

الواضح إنها بتختلف من محافظة لأخرى
فأنا ها اخلليها متاحة للكل يختار كل واحد ما يريد و خلاص
زي برنامج الطالب كده

من طرف عباس رضا الأحد 30 نوفمبر 2014, 12:15 pm

تسلم يا غالى والف شكر يا باشا

من طرف عباس رضا الأحد 30 نوفمبر 2014, 2:41 pm

هناك اشاعه قوية بأضافة الدين للمجموع الكلى حد عنده فكره

من طرف عباس رضا الأحد 30 نوفمبر 2014, 2:44 pm

ولو صح الموضوع ده يبقى كنترول 55 معدل محتاج تعديل يا غالى

من طرف **naderwatfa** الأحد 30 نوفمبر 2014, 3:04 pm

عباس رضا كتب:ولو صح الموضوع ده يبقى كنترول 55 معدل محتاج تعديل يا غالى

أعتذر بشدة عن ذلك
لا يمكنني إضافة مادة لكنترول 55 أو أي برامج كنترول
أنا أصلاً ها اعدل برنامج الطالب في أضيق الحدود يا أستاذ عباس
لأني باشوف الكتابات البرمجية ذات الخط الصغير دلوقتي بصعوبة و جهد
أمال أنا عملت الكنترول الشامل ليه ؟
مش علشان أي مادة جديدة تضاف للمجموع زي كده ؟
و كنت مستعجل أخلصه بسرعة لأن كل يوم نظري بيضعف من البرمجة بالذات
دلوقتي أنا باقلل الشغل ده تدريجياً لحين التوقف عنه للأبد
حفاظاً على ما تبقى من نظري

من طرف abdelnaserelsaid الأحد 30 نوفمبر 2014, 3:38 pm

ولكن الطالب الحاصل على الشهادة الابتدائية ياخذ شهادة ناجح فقط لما يدخل اولى اعدادى يبقى مستجد فى المرحلة ولما ينجح شهادة ناجح منقول للصف الثانى وفى الصف الثانى يبقى منقول وليس مستجد وهكذا لغاية تالتة اعداى ويكرر ذلك فى الثانوى والمفروض هذا على الكل فى وزارة واحدة وبلد واحدة رغم اختلاف اسم المحافظة

من طرف abdelnaserelsaid الأحد 30 نوفمبر 2014, 3:48 pm

مفيش اى اتجاه لجعل الدين فى المجموع هذا العام لان الوزارة لغت كتيير من القرارات منها تعديل مواد الصف الثانى الثانوى والثالث بعد اعتماد الكتاب الجديد ونزول منه نسخة على موقع الوزارة خاصة مادة الرياضيات وجعل هذا العام مثل العام السابق وهذا واضح فى قرار ٣١٣ذى ماهو ولغى حصة زيادة فى الرياضيات والانجليزى بس وامور اخرى لم تتغير

من طرف ميدو وبيبو الأحد 30 نوفمبر 2014, 4:30 pm

استاذي الفاضل كل عام وحضرتك بخير مدرستى تطبق اللغه الفرنسيه اضفت معلوماتها ودرجاتها فى صفحه الكنترول ولكن عند رصد درجات الاختبارالخاص ومعاينه رصد الدور الاول لم اجد عامود رصد اللغه الفرنسيه ومش عارفه المشكله فين هل هناك زر لاظهارها ولا ايه وشكرا

من طرف عباس رضا الأحد 30 نوفمبر 2014, 5:06 pm

سلامة نظرك يا غالى ولا يهمك هبقى اخد جهازى للمدرسة اشتغل عليه وربنا يديك الصحة والعافية يا باش

من طرف **naderwatfa** الأحد 30 نوفمبر 2014, 5:23 pm

ميدو وبيبو كتب:استاذي الفاضل كل عام وحضرتك بخير مدرستى تطبق اللغه الفرنسيه اضفت معلوماتها ودرجاتها فى صفحه الكنترول ولكن عند رصد درجات الاختبارالخاص ومعاينه رصد الدور الاول لم اجد عامود رصد اللغه الفرنسيه ومش عارفه المشكله فين هل هناك زر لاظهارها ولا ايه وشكرا

اضغطي زر رصد أعمال تيرم1 مثلاً فتظهر اللغة الفرنسية لو مختفية في صفحة الرصد
و نفس الشيء في صفحة الرصد الخاص
بس اتأكدي أولاً إنك قمتي بضبط درجات و شروط الاختبار الخاص من صفحة الكنترول
لأن له شروط خاصة به غير الاختبارات العادية
و له زر خاص بذلك في الصفحة دي برضه

من طرف **naderwatfa** الأحد 30 نوفمبر 2014, 5:25 pm

عباس رضا كتب:سلامة نظرك يا غالى ولا يهمك هبقى اخد جهازى للمدرسة اشتغل عليه وربنا يديك الصحة والعافية يا باش

مش ها يضيفوا الدين للمجموع خالص يا أستاذ عباس
لا تصدق هذه الإشاعات
ممكن يحذفوه خالص ، إنما يضيفوه للمجموع ؟
أكيد مش ها يحصل على الأقل اليومين دول

من طرف عباس رضا الأحد 30 نوفمبر 2014, 5:46 pm

ههههههههههههههههههههه عنندك حق نحن اصبحنا امه بلا دين

من طرف **naderwatfa** الأحد 30 نوفمبر 2014, 6:13 pm

تم تعديل برنامج الكنترول الشامل رقم1
حيث تم تعديل قائمة قيد الطالب في صفحة البيانات لتشمل المستجد و المنقول في نفس الوقت
و تم بحمد الله إعادة رفع البرنامج اليوم

من طرف ميدو وبيبو الأحد 30 نوفمبر 2014, 6:43 pm

naderwatfa كتب:
ميدو وبيبو كتب:استاذي الفاضل كل عام وحضرتك بخير مدرستى تطبق اللغه الفرنسيه اضفت معلوماتها ودرجاتها فى صفحه الكنترول ولكن عند رصد درجات الاختبارالخاص ومعاينه رصد الدور الاول لم اجد عامود رصد اللغه الفرنسيه ومش عارفه المشكله فين هل هناك زر لاظهارها ولا ايه وشكرا

اضغطي زر رصد أعمال تيرم1 مثلاً فتظهر اللغة الفرنسية لو مختفية في صفحة الرصد
و نفس الشيء في صفحة الرصد الخاص
بس اتأكدي أولاً إنك قمتي بضبط درجات و شروط الاختبار الخاص من صفحة الكنترول
لأن له شروط خاصة به غير الاختبارات العادية
و له زر خاص بذلك في الصفحة دي برضه

تمام يا استاذنا بارك الله فيك تم التنفيذ

من طرف abohatabalex الأحد 30 نوفمبر 2014, 8:10 pm

naderwatfa كتب:
تم تعديل برنامج الكنترول الشامل رقم1
حيث تم تعديل قائمة قيد الطالب في صفحة البيانات لتشمل المستجد و المنقول في نفس الوقت
و تم بحمد الله إعادة رفع البرنامج اليوم

يا أخى الفاضل كل عام وانت بخير والف سلامة على نظرك وعينيك وأنا آسف للإزعاج
ولكن انت طمعتنا فيك وفتحت الباب للخدمات ... بس الواحد بيكره اليأس ويقبل التحدى والوصول للأفض والبركة فيك ....
عندنا ياسيدى نتعامل مع أشخاص فى منتهى السذاجة ولا أريد أن أقول الغباوة والأوراق ترجع أكثر من مرة لاختلاف فى بعض المسميات مع ان الأمر واضح وكما قلت سابقا حفنة من الموظفين المكتبيين بلا عقول ولا تفكير واعتقد بلا قلوب مجرد آلات خشبية مبرمجة على شيء واحد ...
* المستجد عندنا هو الناجح والمنقول لأول مرة فى الصف الذى انتقل اليه وليس معيدا وباقيا للإعادة .. حاولت مرارا توصيل هذه المعلومة لك .
وقد حاولت الاستفادة من الاستاذ عباس وكيف توصل للحل فلم أنجح أيضا .
** تعديل برنامج الكنترول الشامل رقم1 القائمة تم تعدياها فى الصف الأول وتشمل جميع الاختيارات فعلا كما هو مطلوب
أما الصف الثانى فتظهر القائمة منقول منقولة ومكررة مرتين بدون مستجد مستجدة
وأعتذر مرة أخرى

من طرف abohatabalex الأحد 30 نوفمبر 2014, 9:08 pm

عباس رضا كتب:تسلم يا غالى والف شكر يا باشا

شكرا للأستاذ نادر
شكرا للأستاذ عباس
كل عام والجميع بخير

من طرف **naderwatfa** الإثنين 01 ديسمبر 2014, 4:56 am

لا مشكلة أستاذ محمد
تم عمل اللازم و إعادة رفع الكنترول الشامل
بتاريخ اليوم 1 / 12 / 2014

من طرف عباس رضا الإثنين 01 ديسمبر 2014, 5:32 am

صباح الفل على عيونك يا باشا وربنا يديك الصحة والعافيه

من طرف **naderwatfa** الإثنين 01 ديسمبر 2014, 6:30 am

عباس رضا كتب:صباح الفل على عيونك يا باشا وربنا يديك الصحة والعافيه

ربنا يبارك فيك يا أستاذ عباس
صباح الورد

من طرف abohatabalex الثلاثاء 02 ديسمبر 2014, 9:00 pm

naderwatfa كتب:
لا مشكلة أستاذ محمد
تم عمل اللازم و إعادة رفع الكنترول الشامل
بتاريخ اليوم 1 / 12 / 2014

الواحد بقى مكسوف من نفسه ومش عارف يقول ايه !!!!!!!!!!!!!!!!!!!!!
ألف مليون شكر معطر بالورد والياسمين
ودعواتنا لك بالصحة والعافية
وتحية لكل الزملاء

من طرف **naderwatfa** الأربعاء 03 ديسمبر 2014, 2:12 am

الشكر لله يا أخي
و كل سنة وانت طيب

من طرف مجدى نبيل الأربعاء 03 ديسمبر 2014, 4:11 pm

استاذ نادر رجاء التكرم بعمل برنامج الطالب ل 80 أسم مع تحياتى للجميع

من طرف **naderwatfa** الخميس 04 ديسمبر 2014, 5:06 am

أنا بالفعل شغال على تعديل برناج الطالب مش ل 80 اسماً في الفصل فقط
و لكن لغاية 100 اسم
يعني القائمة ها تكون صفحتين علشان الخط ما يصغرش قوي
الصفحة الواحدة فيها 50 اسماً
الفصول اللي عدد طلابها 50 أو أقل ها تظهر في صفحة واحدة بس
و الفصول اللي عدد طلابها أكثر من 50 ها تظهر في صفحتين
بس التعديل ده بيحتاج لشغل في صفحات عديدة في البرنامج
و لأن وقتي محدود على الكمبيوتر ( ساعة فقط للبرمجة يومياً ) لظروف صحية
فكل يوم باعمل صفحة
أنا بقالي أسبوع تقريباً شغال في التعديل ده
و حالياً فاضل صفحة أخيرة و يكون التعديل انتهى
يعني إن شاء الله بكرة الجمعة أرفع البرنامج

من طرف عباس رضا الخميس 04 ديسمبر 2014, 5:26 am

naderwatfa كتب:
أنا بالفعل شغال على تعديل برناج الطالب مش ل 80 اسماً في الفصل فقط
و لكن لغاية 100 اسم
يعني القائمة ها تكون صفحتين علشان الخط ما يصغرش قوي
الصفحة الواحدة فيها 50 اسماً
الفصول اللي عدد طلابها 50 أو أقل ها تظهر في صفحة واحدة بس
و الفصول اللي عدد طلابها أكثر من 50 ها تظهر في صفحتين
بس التعديل ده بيحتاج لشغل في صفحات عديدة في البرنامج
و لأن وقتي محدود على الكمبيوتر ( ساعة فقط للبرمجة يومياً ) لظروف صحية
فكل يوم باعمل صفحة
أنا بقالي أسبوع تقريباً شغال في التعديل ده
و حالياً فاضل صفحة أخيرة و يكون التعديل انتهى
يعني إن شاء الله بكرة الجمعة أرفع البرنامج

والله احنا مش عارفين نعمل معاك ايه يا نادر باشا ربنا يجزيك خير ويتم شفاك على خير انت وامة محمد صلى الله عليه وسلم

من طرف **naderwatfa** الخميس 04 ديسمبر 2014, 5:34 am

صباح الخير يا أستاذ عباس
كفاية دعوتك لي
فهذه الدعوات هي كل ما أتمناه منكم
بارك الله لكم و فيكم

من طرف abdelnaserelsaid الخميس 04 ديسمبر 2014, 2:32 pm

ربنا يكرمك انشاء الله يا استاذ نادر ويجعله فى ميزان حسناتك وان الله لايضيع اجر من احسن عملا وادعواالله ان ينيير لك البصر والبصيرة وكمان لازم تحافظ على صحتك لانها من ضمن الامانة وربنا يوفقك الى الخير والصواب

من طرف عباس رضا الخميس 04 ديسمبر 2014, 4:23 pm

عاوز استفسر عن حاجه بخصوص السرى اللى يا باشا انا عندى المدرسة مشتركة فبعمل فى الكنترول فصل اوراق البنين عن البنات يعنى مثلا بخلى 220 بنين لوحدهم ودول السرى بتاعهم مثلا هو البداية ليهم كلهم وبعدين بكتشن البنات وبيدأ السرى بتاعهم بعد سرى البنين على طول السؤال بقى ممكن عن طريق السرى الألى عمل سرى الذكور اولا او الأناث اولا ولك جزيل الشكر

من طرف abdelnaserelsaid الخميس 04 ديسمبر 2014, 7:15 pm

استاذ عباس طبعا استاذ نادر يرد عاى حضرتك ولكن احب اقول انا ف مدرستى اكتب الذكور اولا وبعدهم البنات مسلسل واحد ورقم جلوس مسلسل واحد والسرى ١ اكتشن ارقام الجلوس كل ٢٥ ياخذوا سرى معين بحيث ف النهاية سرى مسلسل واحد وعند ترقيم السرى الاحظ العدد الفردى جلوس مع الفردى سرى والزوجى مع الزوجى علشان يكتشف الخطا سريعا عند دق السرى او لو الاعداد كبيرة اكتشن كل ٥٠ رقم جلوس ولكن السرى الالى على ما اعتقد اوبشن عالى وممكن ياخذ وقت عند تجهيز الورق مجموعات للترقيم والله اعلم مجرد راى والاستاذ نادر يفيدنا وبالمرة يعرف انا شغال صح ولا ايه والافضل السرى الالى ولا اليدوى

من طرف عباس رضا الخميس 04 ديسمبر 2014, 9:06 pm

استاذ abdelnaserelsaid انا عارف والحمد الله شغل الكنترول كويس انا سؤالى ممكن احدد مجموعات الذكور ومجموعات الأناث فى السرى الألى بحيث يكون كل مجموعه على حده من حيث الجنس

من طرف abohatabalex الخميس 04 ديسمبر 2014, 10:07 pm

عباس رضا كتب:عاوز استفسر عن حاجه بخصوص السرى اللى يا باشا انا عندى المدرسة مشتركة فبعمل فى الكنترول فصل اوراق البنين عن البنات يعنى مثلا بخلى 220 بنين لوحدهم ودول السرى بتاعهم مثلا هو البداية ليهم كلهم وبعدين بكتشن البنات وبيدأ السرى بتاعهم بعد سرى البنين على طول السؤال بقى ممكن عن طريق السرى الألى عمل سرى الذكور اولا او الأناث اولا ولك جزيل الشكر

وانا عايز استفسر من الاستاذ عباس ايه الحكمة من فصل اوراق البنين عن البنات سواء فى السرى أو الكتشنة ؟
لأن عندنا ايضا المدرسة مشتركة والبرنامج كما هو معروف يرتب البنين اول وبعدها البنات والجلوس بالتسلسل والسرى كما تريد حسب المجموعات التى تريدها وتكتشن كما تريد

من طرف abdelnaserelsaid الخميس 04 ديسمبر 2014, 10:21 pm

انا عارف يا استاذ عباس ان انت فاهم ده شئ طبيعى لكنى احكى ال بعمله بالمرة علشان سؤالك ح يفيدنى الرد عليه من الاستاذ نادر لانى لم استعمل السرى الالى ومش عايز اغامر بالمحاولة لانى شغال على اصدار ٢٨ وكومبيوتر المدرسة ذى ما انت فاهم وانا اسف لو كان ردى ضايق حضرتك بدون قصد ولك جزيل الشكر وتصبح على خير

من طرف عباس رضا الجمعة 05 ديسمبر 2014, 5:32 am

الحكمة من فصل البنين عن البنات عندنا المدرسة كبيرة وعدد طلبة الفصف حوالى 600 طالب وهيئة تدريس كل ماده صغيرة وعند تقسيم الطلبة لبنين وبنات بيريحنا فى حاجة انهم بيصححو نص الورق فى يوم والنص فى يوم تانى وبناء على ذلك يتيح لى نص مراجعة ورصد نص الورق على بعض واللى مسلسل السرى بتاعهم مرتب ورا بعض اما لو كان السرى مكتشن بنين على بنات اللهم انى مش هرصد الماده إلا بعد لما تخلص خالص علشان ارصد بالترتيب لأن الكتشنة هتخلى مجموعة بنات تخش ورا مجموعة بنين والعكس مش اكتر من ذلك

من طرف **naderwatfa** الجمعة 05 ديسمبر 2014, 5:38 am

لا يوجد في البرنامج إمكانية عمل سري آلي للبنين منفصل عن البنات
و من يريد عمل ذلك يمكنه عمل 3 نسخ من البرنامج
واحدة للبنين لعمل السري لهم و التانية للبنات لعمل السري لهن
و الثالثة لشغل الكنترول بنين مع بنات و يقوم بنقل السري من البرنامجين إليه

من طرف عباس رضا الجمعة 05 ديسمبر 2014, 5:44 am

صباح الفل يا عم نادر طب ممكن نحل المشكلة دى بأعادة رفع برنامج السرى الألى مرة اخرة لأنه هيكون بالطبع اخف واسرع من شيت الكنترول فى الفتح والغلق

من طرف **naderwatfa** الجمعة 05 ديسمبر 2014, 6:05 am

طيب أعطني بعض الوقت علشان أدور عليه لأني على ما يبدو حذفته من عندي
فلو كنت حذفته بالفعل يبقى ها احتاج لشوية وقت علشان أعمله من جديد

من طرف عباس رضا الجمعة 05 ديسمبر 2014, 6:11 am

برحتك يا باشا واسف على تعبك معانا بس معلش بقه عشمنا فيك كبير

من طرف **naderwatfa** الجمعة 05 ديسمبر 2014, 6:15 am

أنا تحت أمركم يا أستاذ عباس
و يسعدني دائماً مساعدة كل الناس يا أخي
أنا خلصت برنامج الطالب رقم 32 و رفعته للتجربة
أتمنى أن يكون على ما يرام علشان ما اضطرش لتعديله تاني
لأني مشغول قوي الأيام دي

من طرف عباس رضا الجمعة 05 ديسمبر 2014, 6:18 am

جارى التحميل لكن هو ايه اللى كان خطأ فى الأصدار السابق علشان تعمل ده

من طرف **naderwatfa** الجمعة 05 ديسمبر 2014, 6:21 am

عباس رضا كتب:جارى التحميل لكن هو ايه اللى كان خطأ فى الأصدار السابق علشان تعمل ده

ما فيش خطأ و لا حاجة
بس فيه زملاء عندهم الفصول أكتر من 70 طالباً في الفصل الواحد
و طلبوا مني زيادة عدد طلاب الفصل في البرنامج
فأنا زودت العدد لغاية 100 طالب
و عملت شوية تعديلات برمجية
و حذفت كشف الرصد الورقي لأنه موجود في الكنترول الشامل

من طرف عباس رضا الجمعة 05 ديسمبر 2014, 6:22 am

تمام كده انا فهمت ربنا يقويك علينا والله

من طرف **naderwatfa** الجمعة 05 ديسمبر 2014, 6:33 am

أنا لقيت عندي برنامج السري الآلي ل 500 طالب
سأقوم إن شاء الله بتعديله ل 2000 طالب علشان يناسب الكنترول الشامل
و بعد كده أرفعه

من طرف عباس رضا الجمعة 05 ديسمبر 2014, 6:36 am

تسلم يا غالى

من طرف **naderwatfa** الجمعة 05 ديسمبر 2014, 9:09 am

عباس رضا كتب:تسلم يا غالى

تم رفع البرنامج بتاع السري الآلي الجديد
موجود دلوقتي في قسم البرامج المدرسية

من طرف عباس رضا الجمعة 05 ديسمبر 2014, 9:34 am

تسلم يا جميل جارى التحميل

من طرف عباس رضا الجمعة 05 ديسمبر 2014, 9:45 am

البرنامج تمام اخى العزيز والحمد الله

من طرف **naderwatfa** الجمعة 05 ديسمبر 2014, 10:25 am

عباس رضا كتب:البرنامج تمام اخى العزيز والحمد الله

الحمد لله
بس يا ترى ده برنامج السري الآلي و اللا الطالب ؟

من طرف عباس رضا الجمعة 05 ديسمبر 2014, 10:32 am

الأثنين طبعا يا اخى العزيز إلا ان برنامج الطالب اصبح بطئ بعض الشئ

من طرف مجدى نبيل الجمعة 05 ديسمبر 2014, 12:30 pm

اشكرك استاذ نادر على اضافة وزيادة عدد الاسماء للطلبة فى برنامج الطالب ولكن ظهرت ملحوظة وهى المقيد 81 والمنقول 52 والمعيد 29 ولكن البرنامج طلع النسب كالاتى منقول 52 والمعيد 30 أى يوجد طالب زيادة فى المعيد مع العلم ان نسخة 31 مظبوطة مع تحيانى